ژپێخه‌مه‌ت پێش ئێخستنا پروسا ئاڤه‌دانكرن وخزمه‌تكرنێ ل پارێزگه‌ها دهوكێ كارگێریا پارێزگه‌هێ گرنگیه‌كا تایبه‌ت دایه‌ ئاڤاكرنا وان پروژێن  گرنگ وگرێداى ب ژیانا گشتى  ڤه‌ نه‌خاسمه‌ دوباره‌ ئاڤاكرنا گوندا وگه‌هاندنا پروژێن فه‌ر یێن گرێداى ب ژیانا وه‌لاتیان ڤه.

بوڤێ مه‌ره‌مێ كارگێریا پارێزگه‌هێ هه‌مى شیانێن  خو ئێخستینه‌ كارى بو پێش ئێخستنا كارێ ده‌زگه‌هێن گشتى ، بتایبه‌تى ده‌زگه‌هێن خزه‌متگوزارى وئاڤه‌دانكرنێ ، ئه‌ڤ بزاڤا دهێته‌ كرن نه‌یا ڤه‌شارتیه‌ به‌لكو یا دیار وبه‌ر چاڤه‌ ، نه‌ل سه‌رئاستێ پارێزگه‌هێن هه‌رێما كوردستانێ بتنێ به‌لكو ل سه‌ر ئاستێ پارێزگه‌هێن دى یێن عیراقێ ، وژبه‌رڤێ بزاڤا خورت یا ئاڤه‌دانكرنێ ل ده‌ڤه‌رێ هزرا دامه‌زراندنا سه‌نته‌رێ پێشڤه‌برن وگه‌شه‌پێدانێ ل پارێزگه‌هێ هاته‌ كرن بو هندێ كارێ ده‌زگه‌هێن كارگێرى وئاڤه‌دانكرنێ ل سه‌ر بنه‌مایێن زانستى بهێته‌ پێش ئێخستن وپێشڤه‌برن ، ومفا ژ سه‌ربورا وه‌لاتێن سه‌ربور دڤى بیاڤى دا هه‌ى بهێته‌ وه‌رگرتن.

دامه‌زراندنـــا ڤى سه‌نته‌رى پێنگـــاڤه‌كه‌ ژبــو خوشكرنـا بیـاڤى ل به‌رامبـه‌ر ڤه‌كـولـه‌ر وتایبه‌تمه‌ندێن زانكو وپه‌یمانگه‌ه  وسازیێن زانستى وبنگه‌هێن ڤه‌كولین وخاندنان دپروسا وه‌رار وپێشڤه‌برنێ دا وبزاڤائاڤه‌دانكرنێ ئه‌وا پارێزگه‌ه بخوڤه‌ دبینیت.

گه‌له‌ك پروژێن ئاڤه‌دانكرنێ وخزمه‌تكارى یێن نوكه‌ دهێنه‌ بجه ئینان ب پشته‌ڤانیا حكومه‌تا هه‌رێما كوردستانێ  وب پارێ  به‌رنامێ ڤه‌ژاندنا هه‌رێما ، بو زانین ئه‌ف  پروژه‌ كه‌رتێن ئاڤ وكاره‌بێ وخزمه‌تێن باژێرڤانى ونویژه‌نكرنا قوتابخانا وبنگه‌هێن ساخله‌میێ وپروژێن ئاڤدان وپورژێن رێكا زێده‌بارى بجه ئینانا پروژێن بله‌ز وفه‌ر وئه‌وێن گرێداى ب ژیانا روژانه‌ یا هاولاتیان ڤه‌ نه‌خاسمه‌ پشته‌ڤانیكرنا ده‌ربه‌ده‌را.